Jubiläumsgedicht

Lyceum 100 Jahre

von DORETTE GLOOR APRIL 2018

HIT GITS HUNDERT JOOR ZEM FYRE
E SCHENE GRUND ZEM JUBILYYRE

NO 75 JOOR ÄNDET DR GRÜNDIGSBRICHT
MIT EM-N-ME TYPISCHE BASLERGEDICHT,
WO BESCHRYBT WORUM UND AU WIESO
S SYG ZUN-ER-E LYCEUMSGRÜNDIG KO
DIE ODE ÄNDET MIT WINSCH DE BESTE
DERNO DIEN LYCEINE GNÜSSLIG FESTE.

AU IN DE LETSTE FÜNFEZWANZIG JOOR
WIRD VYYL GLEISTET UND KUNNT VYYL VOR

ALS ALLER ERST’S HAN Y DRUM WELLE
VO DER ZÜGLETE IM NULLDREI VERZELLE.

S ALT CLUBLOKAL ISCH ZUE ALLER FRAID
DOMOLS IM HUUS ZER DR AUGEWAID
PÄCH ISCH SICHER DR ZYPUNKT, WO
ME HET MIESSE DIE AUGEWAID VERLOO
D STADT HET NIT KENNE WIDERSTOO
BI EM-N-ME VERKAUF VYYL GÄLD Z BIKO

„AU WENN IR EICH ALLI HOOR DIEN RAUFE
UUSE MIT EICH MIR DIEN VERKAUFE“

WÄR DO NIT D OTTO ROSEMARIE
ES WÄR E WORHAFTS DRUURSPIL GSY

D PRÄSIDENTIN HET MIT ÄNGELSZUNGE
DR VERWALTIG DIE NEUE RÜÜM ABGRUNGE
SI ERKLÄRT DR BASLER PROMINÄNZ
WAS DE CLUB SO LEISTET, MIT KOMPETÄNZ
E PAAR VO DE REET FALLT PLETZLI Y
JÄ, D MAMME ISCH JO AU LYCEIN GSI
UND AM SCHLUSS GRIEGT SI RAZ FAZ
PRUNKGMÄCHER UF EM MÜNSTERPLATZ

JETZT STOOT E GROSSE UMZUG A
WO D OEKONOMIN KUUM VERGRAFTE KA

ES HAISST, DASS ME ZWEI TIEFI VERLIESS
VO DAUSIG ORDNER ENTRÜMPLE MIESS
DIE AKTE HEBE SCHREGGLIG GFIECHELET
DENN IN DÄNE KÄLLER HEBI’S NICHELET
DIE FRAUEN SCHLEPPE VYYL UND SCHWÄR
IBER UUSTRAPPTY STUEFE, S ISCH PREKÄR
DIE ARME FRAUE HÄN ZEM SCHLUSS
NONE AFFAL KA VO ME HÄXESCHUSS

DANGGBAR, ME DUET SICH NO HITT ERBAUE
IM DE SCHEENE RÜÜM IM HOF ANDLAUE

E INTERNATIONALE KONGRÄSS SIG PLANT
IM GASTLIG, BERÜEMTE SCHWIZERLAND
PLANT ISCH ALLES FIR ZWAINULLNNULVIER
UND ZWOOR IN ASPRUCHSVOLLER MANIER
UND GNAU WIE ALLGEMEIN BEKANNT
HET JEDE CLUB SI SPEZALVORWAND
WORUM SICH SO-NE GROSSALOSS
AN SIM ORT NIT DUREFIERE LOSS!

ALLI AUGE SIN UF D BASLERE GRICHTET
WO SICH SCHLIESSLIG DERZUE VERPFLICHTET
SO EEREVOLL SONE UFFTRAG ISCH
ALS PRÄSIDENTIN ALLAI VERLORE BISCH
E VORSTAND, WO SO OONI VORBEHALT
AISTIMMIG MITZIET, FINDSCH NIT SO BALD
ES SIN AU DÄNE IRI GATTE Z LOBE
WO UNTERSTÜTZIG GÄ HÄN AM FYROBE
WO IN IREM GSCHÄFTSBEKANNEKREIS
NOFROOGE , OB EPPER VILLICHT WEISS
WO’S RÜÜM GIT, WO WÄRE ANNÄMBAR
FIR AN INTERNATIONALI DAMESCHAR.

SI MELDE SICH UUS ALLE RICHTIGE
DIE WUNDERFIZIGE UND DIE WICHTIGE
WENN ME SCHO DIE SCHWYZ KA BSUECHE
WOTT ME SCHNÄLL SI TEILNAM BUECHE

DREIHUNDERT DAME MELDE SICH A
UND MECHTE E 5 STÄRNHOTEL HA
SIE WISSE NIT, DASS ME SCHO KA
E WAICH KISSI IM E DREI-STÄRN HA!

D PRESIDÄNTIN, DIE INTERNATIONALI
WOTT FIR DER VORTRAG KAI BANALI
REFERÄNTIN US EUROPA HOLE
UND VERKÜNDET UNVERHOLE
ZMINST D CLINTON HILARY MIESS ES SY
MIT WENIGER SIG SI NIT DERBY
GAGE WÄR HUNDERT- DAUSIG DOLLAR
WO MEGLIG AU NO SCHWARZ UND BAR.
D BASLERINE ERKLÄRE EXPLIZIT
DIE FORDERIG GIENG MIT EM BUDGET NIT
AU DO HET SICH E LÖSIG GFUNDE
FIR E BESCHAIDERY VORTRAGSRUNDE

E SCHWYZERREIS, DASCH EVIDÄNT
FIR GESCHT US ANDERE KONTINÄNT
WIE BRINGT ME DIE HEERE ZYYL NUR GUET
IN SO KNAPPER ZYT UNTER AI HUET?
D JUNGFRAU, DR BÄREGRABE Z BÄRN
E SUMMERFONDÜ IN LUZERN
GENF BEKANNT FIR SY SCHEENE SEE
SOTT AU IM ZYTPLAN SY PERSEE
D PLANERINNE HÄN KENNE E ROUTE ERKUNDE
WO ALLGEMEIN HET BEGAISTERIG GFUNDE

UUSTELLIGE, REISE, GEBÜÜRE UND GSCHÄNGG
TRINGGÄLDER, VORDRÄG UND GETRÄNGG
WIE UND MIT WAS BERAPPE DIE SUMME
WENN DE KONGRÄSS EMOLL ISCH UMME?

ES HILFT GROSSZÜGIG MIT BESTER KULISSE
BASLER FILIALE VOR DER CREDIT SUISSE
DANGG IRE SIN D WÄRG VO DE KÜNSTLERINE
IM BESTE LICHT UND GLANZ ERSCHINE
SI GIT IRI SCHAUKÄSTE FIR DIE ZYT
UND FIR DER LETSCHTI APPETIT
OFFERYRT SI E KULINARISCHE GNUSS
UND ZAALT DER APERO ZEM SCHLUSS.
ONI DÄM GROSSZÜGIGE GEBARE
MIESST DER CLUB NO HITTE SPARE

AM ÄND DIEN D GESCHT IN ELEGANTE ROBE
DIE BASLER LYCEYNE ÜBER ALLES LOBE
SIE BIKEMME APPLAUS ME DUET SI EERE
DENN DERFE SI USRUE UF IRI LORBEERE

D SCHWYZER LYCEYYNE GNIESSE DE HUB
UND KEMME REGELMÄSSIG IN DÄ CLUB
MIT IHRER GV, DENN SI WISSE
D ORGANISATION LOSST NYT VERMISSE
SO SIN DIE DAME GÄRN DERBY
ANERE GV IN DR STADT AM RHY
NIT WENIGER ALS DREY BASLERYNE
HOLT ME IN SCHWYZERVORSTAND YNE.

S VYLFÄLTIG AGEBOT DUET ME HONORIERE
UND SICH SCHO ZEM NÜNZISTE GRATULIERE
UND IM GLAINE KLINGEDAAL GASTIERE
WORUM SOLL ME NIT E FEST KREIERE
UND DR CLUB ALS GANZES HONORIERE?

D FÖDERIG VO KUNST IN ALLE SPARTE
HILFT NI SÄLTE E KARRIERE STARTE
ME STUUNT IBER DIE MANNIGFÄLTIGKEIT
AN USTELLIGE HIT UND DER VERGANGEHEIT
MOLEREI UF SYYDE, HOLZ UND PAPYR
SCHMUGGSTÜGG IN JEDWEDER MANYR
KUMM E DING, WO ME NIT KA VERZIERE
UND ZEM AKAUF IN VERSUECHIG FIERE.
DIE WO SCHRYYBE UND AU D SOLISTE
DERFE NIT FÄÄLE UF DÄRE LISTE.
MER GNIESSE DAS, ES DUET IS VERBINDE
MER WÄN DE KÜNSCHT A KRÄNZLI WINDE

IM BASLER CLUB GITS SO VYYL SEKTIONE
SI EINZEL Z BESCHRYBE TÄT SICH LOONE
ES GÄBT SO UNENDLIG VYYL ZEM SAGE,
ABER, ME MIESST S HITTIG FEST VERTAGE.

FIR UNSERI INTRÄSSE, DAS ISCH RICHTIG
SIND ALLI UNSERI SEKTIONE WICHTIG
A DANGG UND LOB AN DIE VYYLE DAME,
WO ALL DAS ORGANISIERE IN IREM RAAME
ME KA IMMER LEERE UND NEYYS ERFARE
ODER WAS IM KOPF ISCH DERT BEWARE
UND VILLICHT – WYT ÜBER DAS USE
KÜSST AU EMOL E MITGLIED E MUUSE

SCHLUSS

A VYYLSYTIGE WUNSCH WÄRI NO DO
DASS DR CLUB MEG BHALTE SY NIVEAU
UND SO UFFGSTELLT BLYBE SOWIESO.
DÄ UNVERBRÜCHLIGI ZÄMMEHALT
SOLL FURTBESTOO BI JUNG UND ALT
DIE TREUY FRINDSCHFT SOLL WYTERLÄBE
SUNSCHT WÄR JO UNSERI MIE VERGÄBE

ER BLYB ERHALTE DE GEISTIG RYCHTUM
DAS ISCH DER WUNSCH FIR DR LYCEUM